ສຳນັກຂ່າວຕ່າງປະເທດ ລາຍງານໃນວັນທີ 29 ພະຈິກຜ່ານມານີ້ວ່າ ປະທານາທິບໍດີ ວະລາດິເມຍ ປູຕິນ ໄດ້ເຊັນລັດຖະດຳລັດ ປະກາດມາດຕະການ ຢຸຕິການບໍລິການ ເຮືອບິນເຊົ່າເໝົາລຳ ລະຫວ່າງຣັດເຊຍ ແລະ ຕວກກີ, ຫ້າມວິສາຫະກິດຂອງຣັດເຊຍ ຈ້າງແຮງງານຊາວຕວກກີ ແລະ ຈຳກັດການນຳເຂົ້າສິນຄ້າ ບາງປະເທດຂອງຕວກກີ ຕະຫລອດຮອດ ລະງັບການຂາຍທົວທ່ອງທ່ຽວ ໄປຍັງປະເທດຕວກກີ ຊຶ່ງປົກກະຕິແລ້ວ ເປັນປາຍທາງທີ່ຊາວຣັດເຊຍ ນິຍົມໄປທ່ອງທ່ຽວ ຫລາຍທີ່ສຸດ ຊຶ່ງບັນດາມາດຕະການຂວ້ຳບາດດັ່ງກ່າວນີ້ ຈະມີຜົນບັງຄັບໃຊ້ ນັບຕັ້ງແຕ່ວັນທີ 1 ມັງກອນ 2016 ເປັນຕົ້ນໄປ.

ທັງນີ້ ເຫດຜົນຂອງການປະກາດໃຊ້ ລັດຖະດຳລັດ ມາດຕະການຂວ້ຳບາດດັ່ງກ່າວ ແມ່ນເພື່ອປົກປ້ອງຄວາມໝັ້ນຄົງຂອງປະເທດ ແລະ ພົນລະເມືອງຣັດເຊຍ ຈາກອາຊະຍາກຳ ແລະ ກິດຈະກຳຜິດກົດໝາຍອື່ນໆ ແລະ ເປັນຜົນຈາກການຕອບໂຕ້ ເຫດການທີ່ເຮືອບິນສູ້ຮົບຕວກກີ ຍິງເຮືອບິນ Su-24 ຂອງຣັດເຊຍຕົກ ໃກ້ຊາຍແດນຊີຣີ ເມື່ອວັນທີ 24 ພະຈິກຜ່ານມາ.