ຂປລ. ນັບແຕ່ ສປປ ລາວ ແລະ ສ ເກົາຫລີ ໄດ້ສ້າງຕັ້ງສາຍພົວພັນການທູດ ໃນ 1995 ເຫັນວ່າສາຍພົວພັນ ແລະ ການຮ່ວມມືສອງຝ່າຍ ນັບມື້ໄດ້ຮັບການຂະຫຍາຍຕົວຢ່າງບໍ່ຢຸດຢັ້ງ ໂດຍສະເພາະ ດ້ານພົວພັນທາງການທູດ, ການພັດທະນາເສດຖະກິດ-ສັງຄົມ, ກະສິກໍາ, ການສຶກສາ, ສາທາລະນະສຸກ, ການຄ້າ, ການລົງທຶນ, ແລກປ່ຽນວັດທະນະທໍາ, ການທ່ອງທ່ຽວ ແລະ ອື່ນໆ.
ໃນວັນທີ 30 ພະຈິກ 2015 ຜ່ານມານີ້ ທີ່ນະຄອນຫລວງວຽງຈັນ ໄດ້ຈັດງານສະເຫລີມສະຫລອງ ຄົບຮອບ 20 ແຫ່ງການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ເກົາຫລີ, ໂດຍມີທ່ານ ແສງເພັດ ຮຸ່ງບຸນຍວງ ລັດຖະມົນຕີ ຊ່ວຍວ່າການກະຊວງການຕ່າງປະເທດ, ທ່ານ ຄິມ ຊູ ກວນ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສ ເກົາຫລີ ປະຈໍາລາວ, ມີບັນດາ ລັດຖະມົນຕີຊ່ວຍວ່າການ, ຫົວໜ້າກົມ, ຮອງກົມ, ຜູ້ຕາງໜ້າອົງການຈັດຕັ້ງສາກົນ ແລະ ບັນດາທູຕານຸທູດປະຈໍາ ສປປ ລາວ ພ້ອມດ້ວຍພະນັກງານ ກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານ ແສງເພັດ ຮຸ່ງບຸນຍວງ ໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນ ຂອງວັນສ້າງຕັ້ງສາຍພົວພັນທາງການທູດ ລະຫວ່າງ ສປປ ລາວ-ສ ເກົາຫລີ ເຊິ່ງເປັນຂີດໝາຍອັນສໍາຄັນ ແຫ່ງການພົວພັນ ລະຫວ່າງ ສອງປະເທດຕະຫລອດໄລຍະ 20 ປີຜ່ານມາ, ພ້ອມທັງ ໄດ້ສະແດງຄວາມເພີ່ງພໍໃຈເປັນຢ່າງຍິ່ງ ທີ່ສາຍພົວພັນມິດຕະພາບ ແລະ ການຮ່ວມມື ສປປ ລາວ-ສ ເກົາຫລີ ໄດ້ຮັບການພັດທະນາ, ເສີມຂະຫຍາຍໃຫ້ຈະເລີນງອກງາມຂຶ້ນເປັນລໍາດັບ ເຊິ່ງສະແດງອອກ ໃນການພົວພັນແລກປ່ຽນ ຄະນະຜູ້ແທນຂັ້ນສູງຂອງສອງປະເທດ ແລະ ການໄປມາຫາສູ່ ຂອງປະຊາຊົນສອງຊາດ ລາວ-ເກົາຫລີ ຢ່າງຕໍ່ເນື່ອງ, ໂດຍສະເພາະ ແມ່ນການຢ້ຽມຢາມ ສ ເກົາຫລີ ຢ່າງເປັນທາງການຂອງທ່ານ ຈູມມາລີ ໄຊຍະສອນ ປະທານປະເທດ ແຫ່ງ ສປປ ລາວ ໃນປີ 2013 ອັນໄດ້ເປັນຂີດໝາຍພື້ນຖານອັນໜັກແໜ້ນ ຂອງການຮ່ວມມືສອງຝ່າຍ ເຊິ່ງໄດ້ສະແດງ ໃຫ້ເຫັນເຖິງເຈດຕະນາລົມທາງດ້ານການເມືອງ ທີ່ສືບຕໍ່ເສີມຂະຫຍາຍສາຍພົວພັນການທູດທີ່ມີມາແລ້ວນັ້ນ ໃຫ້ແຕກດອກອອກຜົນ ແລະ ທັງເປັນ ການຊຸກຍູ້ການຮ່ວມມືທາງດ້ານເສດຖະກິດ, ການຄ້າ, ການລົງທຶນ ແລະ ການໄປມາຫາສູ່ກັນ ລະຫວ່າງ ປະຊາຊົນສອງປະເທດໃຫ້ນັບມື້ເພີ່ມຂຶ້ນໃນອະນາຄົດ.
ປັດຈຸບັນ ໂຄງການລົງທຶນຂອງ ສ ເກົາຫລີ ຢູ່ ສປປ ລາວ ຫລາຍກວ່າ 290 ໂຄງການ, ມີມູນຄ່າຫລາຍກວ່າ 750 ລ້ານໂດລາສະຫະລັດ, ຢູ່ໃນອັນດັບທີ 4 ໃນຈໍານວນຜູ້ລົງທຶນຕ່າງປະເທດໃນລາວ, ການຄ້າສອງຝ່າຍບັນລຸ 200 ລ້ານກວ່າໂດລາສະຫະລັດ, ນັກທ່ອງທ່ຽວ ສ ເກົາຫລີ ເຂົ້າຢ້ຽມຢາມ ສປປ ລາວ ປະມານ 2 ແສນກວ່າຄົນ, ອົງການ ຮ່ວມມືສາກົນ (KOICA) ຂອງ ສ ເກົາຫລີ ໄດ້ສະໜອງທຶນຊ່ວຍເຫລືອລ້າ 14 ລ້ານກວ່າໂດລາສະຫະລັດ ເຂົ້າໃນໂຄງການພັດທະນາຊົນນະບົດ ເຊິ່ງໂຄງການດັ່ງກ່າວ ຈະດໍາການຈັດຕັ້ງປະຕິບັດຈົນເຖິງປີ 2019, ໂດຍເນັ້ນໃສ່ການມີສ່ວນຮ່ວມໃນ ສປປ ລາວ ເພື່ອພັດທະນາຊົນນະບົດຂອງຊຸມຊົນ ແລະ ການພັດທະນາຄວາມອາດສາມາດເຊື່ອມໂຍງໃນທຸກລະດັບ, ຊ່ວຍພັດທະນາຊັບພະຍາກອນມະນຸດເປັນຈໍານວນຫລາຍ, ໂດຍກວມເອົາການຝຶກອົບຮົມດ້ານວິຊາການ ແລະ ວິຊາຊີບ ທີ່ມີທັກສະ ໃນໄລຍະສັ້ນ-ຍາວ, ປະລິນຍາຕີ ແລະ ປະລິນຍາໂທ, ໄດ້ສົ່ງອາສາສະໝັກດ້ານສາທາລະນະສຸກ, ກະສິກໍາ ແລະ ອື່ນໆ ເພື່ອປະກອບສ່ວນຊ່ວຍເຫລືອ ສປປ ລາວ.
ແຫລ່ງຂ່າວ:
