ຂປລ. ໃນວັນທີ 4 ທັນວາ 2015 ຜ່ານມານີ້,ສໍານັກງານກົງສຸນກິດຕິມະສັກແຫ່ງ ສປປ ລາວ ປະຈຳສາທາລະນະລັດເຊັກ ໄດ້ຈັດພິທີສະເຫລີມສະຫລອງ ວັນສະຖາປະນາ ສປປ ລາວ ຄົບຮອບ 40 ປີ ຂຶ້ນທີ່ເມືອງເບີໂນ ສ. ເຊັກ,ໂດຍເປັນກຽດເຂົ້າ ຮ່ວມ ຂອງ ທ່ານ ນາງ ອຳພອນ ນາມມາວົງ, ກົງສຸນກິດຕິມະສັກແຫ່ງ ສປປ ລາວ ປະຈຳ ສ. ເຊັກ, ທ່ານ ດຣ. ບຸນທະວີ ສີສຸພັນທອງ, ລັດຖະມົນຕີຊ່ວຍວ່າການກະຊວງແຜນການ ແລະ ການລົງທຶນ; ທ່ານ ສີທົງ ຈິດໂຍທິນ, ເອກອັກຄະລັດຖະທູດແຫ່ງ ສປປ ລາວ ປະຈໍາ ປະເທດເຢຍລະມັນ; ທ່ານ ພູເຂົາ ພົມມະວົງສາ, ເອກອັກຄະລັດຖະທູດ ຜູ້ຕາງໜ້າຖາວອນແຫ່ງ ສປປ ລາວ ປະຈໍາປະເທດໂອຕຣິດ; ມີກົງສູນກິດຕິມະສັກຂອງບັນດາປະເທດຕ່າງໆ ປະຈໍາ ສ. ເຊັກ, ບັນດານັກການທູດ, ບັນດານັກທຸລະກິດ, ຄົນເຊື້ອຊາດລາວ ແລະ ແຂກທີ່ຖືກເຊີນອື່ນໆ ເຂົ້າຮ່ວມປະມານ 70 ກວ່າຄົນ.
ໃນພິທີດັ່ງກ່າວ, ທ່ານ ນາງ ອໍາພອນ ນາມມາວົງ ໄດ້ກ່າວວ່າ: ວັນສະຖາປະນາ ສປປ ລາວ ໃນວັນທີ 2 ທັນວາ 1975, ໂດຍສະເພາະຢ່າງຍິ່ງ ແມ່ນໄຊຊະນະອັນຍິ່ງໃຫຍ່ ແລະ ເປັນປະຫວັດສາດ ພາຍໃຕ້ການນໍາພາຂອງພັກປະຊາຊົນປະຕິວັດລາວ ຈົນໄດ້ຮັບ ໄຊຊະນະຢ່າງສົມບູນ ແລະ ເປີດສັງກາດໃໝ່ແຫ່ງການປົກປັກຮັກສາແລະສ້າງສາປະເທດຊາດ ໄປສູ່ຄວາມວັດທະນາຖາວອນ.
