ກອງ​ປະຊຸມ​ສະໄໝ​ສາມັນເທື່ອ​ທີ 10 ຂອງ​ສະພາ​ແຫ່ງ​ຊາດ ຊຸດ​ທີ VII ວັນ​ທີ 11 ທັນວາ 2015 ເປັນ​ມື້​ທີ 5 ໂດຍ​ການ​ເປັນ​ປະທານ​ຂອງ​ທ່ານ​ນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ພ້ອມດ້ວຍ​ບັນດາ​ຄະນະ​ອະນຸ​ກຳ​ມະການ ແລະ ສະມາຊິກ​ສະພາແຫ່ງ​ຊາດ ໄດ້​ຮັບ​ຟັງ​ການ​ລາຍງານ​ສະພາບ​ການຈັດຕັ້ງ​ປະຕິບັດໂຄງການ​ດາວ​ທຽມ​ລາວ ແລະ ໂຄງການ​ກໍ່ສ້າງ​ທາງ​ລົດໄຟ ແຕ່ຊາຍ​ແດນ​ລາວ-ຈີນ ຫານະຄອນ​ຫຼວງ​ວຽງ​ຈັນ ຂອງ​ທ່ານ ສົມ​ສະຫວາດ ເລັ່ງ​ສະ​ຫວັດ ຮອງນາຍົກລັດຖະມົນຕີ ຜູ້​ຊີ້​ນຳ​ວຽກງານ​ເສດຖະກິດ ການ​ຜະລິດ ແລະ ຈໍ​ລະ​ຈອນ.

ທ່ານ​ຮອງ​ນາຍົກ​ລັດ​ຖະ​ມົນຕີ​ກ່າວ​ວ່າ: ສຳລັບ​ໂຄງການ​ດາວທຽມ ໃນ​ຕຳແໜ່ງ​ວົງ​ໂຄຈອນ 128,5 ອົງສາ​ຕາເວັນ​ອອກ ເປັນໂຄງການ​ທີ່​ລັດຖະບານ​ລາວ ໄດ້ປຶກສາ​ຫາລື​ກັບ​ລັດຖະບານ​ຈີນ ອີງ​ຕາມ​ການ​ຕົກລົງລະຫວ່າງສອງ​ຜູ້ນຳ​ຂັ້ນ​ສູງ​ສຸດ​ຂອງ​ສອງ​ພັກ ແລະ ສອງ​ລັດ ພວກ​ເຮົາ​ໄດ້​ສະເໜີ​ເງິນ​ກູ້​ຢືມ​ຈາກ​ລັດຖະບານ​ຈີນ ໃນ​ປີ 2008 ຈາກ​ນັ້ນ ລັດ​ຖະບານ​ລາວ ໄດ້​ຍື່ນ​ເອກະສານ​ຂໍຈອງ​ຕຳແໜ່ງ​ວົງ​ໂຄຈອນ ຈາກສະຫະພັນ​ໂທລະ​ຄົມມະນາຄົມສາກົນ (ITU) ໃນ​ວັນ​ທີ 13 ພຶດສະພາ 2008 ແລະ ໄດ້​ດຳເນີນຂັ້ນ​ຕອນ​ຕ່າງໆ​ຕາມ​ລະບຽບການ.

ພາຍຫຼັງ​ກະຊວງ​ໄປສະນີ ໂທລະ​ຄົມມະນາຄົມ ແລະ ການ​ສື່ສານ (​ປທສ) ໄດ້​ຮັບ​ການ​ສ້າງຕັ້ງຂຶ້ນໃນ​ປີ 2011 ລັດຖະບານ​ໄດ້ມອບ​ໂຄງການ​ນີ້ ຈາກ​ອົງການ​ວິທະ​ຍາ​ສາດ ແລະ ເຕັກ​ໂນ​ໂລ​ຊີແຫ່ງ​ຊາດ ໃນ​ເມື່ອ​ກ່ອນ​ມາ​ໃຫ້ກະຊວງ ​ປທສ ເປັນ​ຜູ້​ສືບຕໍ່​ຈັດ​ຕັ້ງປະຕິບັດ ຈາກ​ນັ້ນ ໃນ​ວັນ​ທີ 11 ກໍລະ​ກົດ 2012 ຈຶ່ງ​ໄດ້​ເຊັນ​ສັນຍາເງິນ​ກູ້ ແລະ ສັນຍາ​ອື່ນໆ​ທີ່​ກ່ຽວຂ້ອງ (ສະບັບ​ປັບປຸງ) ແລະ ໄດ້ເລີ່ມ​ປະຕິບັດ​ໂຄງການ​ນີ້ ນັບ​ແຕ່ທ້າຍ​ປີ 2012 ເປັນຕົ້ນ​ມາ ເຊິ່ງໂຄງການ​ນີ້​ແບ່ງ​ອອກ​ເປັນ 2 ໄລຍະຄື: ໄລຍະ​ທີ​ໜຶ່ງ​ແມ່ນ​ດຳເນີນການ​ທາງ​ດ້ານ​ເຕັກນິກ​ຕ່າງໆ ຈົນ​ຮອດ​ການ​ສົ່ງ​ດາວ​ທຽມ​ໄປ​ໄວ້ໃນ​ຕຳແໜ່ງ​ວົງ​ໂຄຈອນ ຈົນ​ສຳເລັດ ໃນ​ວັນ​ທີ 21 ພະຈິກ 2015 ຜ່ານ​ມາ ສ່ວນ​ໄລຍະ​ທີ 2 ແມ່ນການ​ບໍລິຫານ​ລະບົບ​ດາວ​ທຽມ ເພື່ອ​ໃຫ້​ເກີດ​ຜົນ​ປະໂຫຍດ​ທາງດ້ານ​ເສດຖະກິດ-ສັງຄົມ.

ໂຄງການ​ນີ້ ຈະ​ສ້າງ​ລາຍ​ຮັບສຳຄັນ ສຳລັບ ​ສປປ ລາວ​ເຮົາ ຈະ​ກາຍເປັນ​ໂຄງ​ລ່າງ​ພື້ນຖານ​ທີ່ສຳຄັນ​ອັນ​ໜຶ່ງ ສຳລັບ​ວຽກ​ງານໂທລະ​ຄົມມະນາຄົມ ແລະ ການສື່ສານ ການ​ກະຈາຍສຽງ-ໂທລະພາບ ເຊິ່ງ​ດາວ​ທຽມ​ແມ່ນ​ປັດ​ໄຈເຕັກນິກ​ອັນ​ໜຶ່ງ​ທີ່​ສຳຄັນ ໃນ​ການກະຕຸກ​ຊຸກຍູ້​ໃຫ້​ເສດຖະກິດ​ແຫ່ງຊາດ ​ມີ​ການ​ຂະຫຍາຍຕົວ ສົ່ງເສີມ​ການ​ພັດທະນາ​ຊັບ​ພະຍາກອນ​ມະນຸດ​ ໃນ​ຂະແໜງການ​ອັນໃໝ່ ແລະ ເປັນ​ແຫຼ່ງ​ລາຍ​ຮັບ​ໜຶ່ງທີ່​ສຳຄັນໃຫ້​ແກ່​ລັດຖະບານ.

ຂະນະ​ທີ່​ໂຄງການ​ທາງ​ລົດໄຟ​ລາວ-ຈີນ ມີ​ລວງ​ຍາວ​ທັງ​ໝົດປະມານ 427,2 ກິໂລແມັດ ນັບແຕ່​ຊາຍ​ແດນ​ຈີນ-ລາວ ມາ​ເຖິງນະຄອນຫຼວງ​ວຽງ​ຈັນ ຈົນ​ຮອດຈຸດ​ຂົວ​ລົດໄຟ​ເຊື່ອມ​ຕໍ່​ລາວ-ໄທແຫ່ງ​ໃໝ່ ຈັດ​ຢູ່​ໃນ​ປະເພດ​ທາງລົດໄຟ​ມາດຕະຖານ​ລະດັບ 1 ມີຄວາມ​ກວ້າງ​ຂອງ​ລາງ​ແມ່ນມາດຕະຖານ​ສາກົນ 1.435 ແມັດ ເປັນ​ປະເພດ​ລາງ​ດ່ຽວ ຄວາມ​ໄວອອກ​ແບບ​ສຳລັບ​ຂົນສົ່ງໂດຍສານ​ແມ່ນ 160 ​ກມ/​ຊມ ແລະ ໄດ້​ອອກ​ແບບ​ສຳຮອງ​ເພື່ອ​ໄວ້ 200 ​ກມ/​ຊມ ໃນ​ເຂດ​ທົ່ງພຽງຄື: ໄລຍະ​ຕອນ​ທາງ​ແຕ່​ແຂວງວຽງ​ຈັນ ຫານະຄອນຫຼວງ​ວຽງຈັນ ຄວາມ​ໄວ​ອອກ​ແບບ​ສຳລັບຂົນສົ່ງ​ສິນຄ້າ​ແມ່ນ 120 ​ກມ/​ຊມ ລະບົບ​ການ​ຂັບ​ເຄື່ອນ​ດ້ວຍ​ພະລັງງານ​ໄຟຟ້າ ມີ​ສະຖານີທັງ​ໝົດ 33 ແຫ່ງ ໃນ​ນີ້ ມີ​ສະຖານີ​ສຳລັບ​ຫຼີກ​ລົດໄຟ 21 ແຫ່ງ ສະ​ຖານີ​ໂດຍສານ 11 ແຫ່ງ ແລະ ສະຖາ​ນີ​ສິນຄ້າ 1 ແຫ່ງ.

ອີງໃສ່​ຄວາມ​ຫຍຸ້ງຍາກ​ທາງດ້ານ​ພູມ​ສາດ ໃນ​ບໍລິເວນ​ເສັ້ນທາງ​ລົດໄຟ​ເດີນ​ຜ່ານ ເປັນຕົ້ນ ຢູ່ເຂດ​ພາກ​ເໜືອ ຄາດ​ຄະເນ​ວ່າ​ຈະໃຊ້​ເວລາ​ໃນ​ການ​ກໍ່ສ້າງ​ເຖິງ 5 ປີ ຈຶ່ງ​ສຳເລັດ ປັດຈຸບັນ ພາກສ່ວນກ່ຽວຂ້ອງ​ທັງ​ສອງ​ຝ່າຍ ​ພວມ​ກະກຽມ​ເງື່ອນໄຂ​ຕ່າງໆ ເພື່ອ​ຮັບ​ປະກັນ​ໃຫ້​ໂຄງການ​ໄດ້​ດຳເນີນ​ໄປຕາມ​ແຜນການ​ທີ່​ວາງ​ໄວ້.

ແຫລ່ງຂ່າວ: